扮有錢人，我有豐富經驗。並不是做得private banker就會識扮有錢人，我識扮，因為我虛榮感過盛。一切能夠扮到有錢人的裝備，我應有盡有。今次，講一樣最基本的，白金卡。今時今日，阿豬阿狗都話自己有張白金卡，因為理論上總之張卡上面寫住platinum就係白金卡。我想講嘅，即係我有嘅，唔係普通白金卡，而是白金卡中的白金卡。
跟親朋戚友在海逸軒午膳，等咗半世都未嫁得出的中年表姐搶住埋單。佢唔係要請食飯，只不過係想用佢張信用卡埋單，然後要我哋畀返現金佢。「我張AE Platinum有折呀，大家可以畀少啲啦。」她拿出銀包說，滿臉自豪。
白金卡也有級別之分
卡就是卡，需要如此強調是AE Platinum，可見這張卡為表姐帶來無限光榮。哥哥見她這樣高調晒卡，於是做個順水人情，滿足一下她的虛榮感，說：「唔該晒表姐，張卡啱啱申請㗎？」果然，聽哥哥這樣一問，表姐着晒燈，答：「係呀，冇，啲朋友話AE Platinum好難申請，入息要求高，所以試吓囉，點知原來咁易攞，一apply就有。」
其實，申請一張American Express Platinum，即是美國運通白金卡，唔係一件好難嘅事。如果真係難嘅，葉朗程都唔會有一張。那當然，我唔會喺表姐面前話：「好巴閉咩？我都有啦！」表姐差唔多40歲人，男朋友都唔多個，難得有樣嘢令佢開心吓，就畀佢開心吓啦。
但話說回來，雖然唔算好難申請，都唔係話想有就有。正如表姐說的一樣，AE Platinum的確有一定的入息要求，而且是by invitation only，即是想主動申請都唔得，要AE邀請你先可以。呢個平時好騎呢嘅表姐竟然有張AE Platinum，膚淺的我對她頓時另眼相看。
怎料，當我看見她從銀包掏出那張她引以為傲的白金卡之際，我在心裏立刻「車」咗一聲。表姐那張美國運通白金卡，是「假」的。「行使『假卡』咁猖狂？拉佢啦！」講笑啫，佢嗰張唔係假卡，而的的確確係如假包換嘅美國運通白金卡，只不過我嗰張美運白金，同佢嗰張美運白金，有好大好大分別。為方便敘述，我就在這裏稱她那張AE Platinum為「假」卡。
攞住張AE Platinum可以係一件幾威嘅事，又可以係一件好普通嘅事，視乎你嗰張係邊張AE Platinum。先講普通嗰張：卡是銀色的，而在右上角就會有個類似武士的人頭，對，那個大大的武士頭就是 American Express的標記。而這張「假」的係人都申請得，絕不是by invitation only。
好啦，到幾威嗰張：卡同樣是銀色的，但這個銀比較深色一點，而那個武士頭是放在卡的正中央，絕不是右上角，而且「頭」的面積較另一張小很多。就咁睇樣，其實「假」嗰張靚過「真」嗰張，因為卡面是閃閃發光的。相比之下，真嗰張個樣好普通，冇咁閃，毫不起眼。但當然，凡事不能看表面，我嗰張AE Platinum同表姐嗰張相比，無論在年費、入息要求、信用上限和找數方法，都有好大分別。
「假」嗰張AE Platinum係credit card，真嗰張AE Platinum係charge card。所謂credit card，都有一個「好處」，就是找數不用全數找，找大半又得，找「min pay」亦可，但charge card就完全冇呢支歌仔唱。呢個月簽咗八千蚊又好，簽咗八萬八又好，charge card都必須要你每個月全數清付。
至於年費，我不太清楚「假」白金的年費是多少，應該不會超過2,000元，但真白金要7,800元。入息要求，則是30萬一年和100萬元一年的分別。最後就是信用上限，即是credit limit，「假」白金好像是大概每個月30萬元，但真白金原則上是不設上限的。咁梗係冇可能真係不設上限啦，每個真白金用戶的上限應該不同。我啱啱問咗AE嗰邊，葉朗程每月最多可以簽90萬至100萬元。算少啦，我有同事個上限係130萬元。
識啲嘢嘅人，睇到呢度，可能會話：「慳啲啦葉朗程，白金卡有幾巴閉呀？又唔係黑卡。」講得好，比起AE嘅黑卡，白金呢張真係挽鞋都未夠資格。扮有錢人好易，但要扮富豪，唔係話食兩餐fine dining就得，要講真材實料。白金卡之上，就是至高無上的黑卡，AE叫這卡做Centurion。
基本上，黑卡冇乜預設條件，但冇人可以一用就直接用黑卡。意思係，想升「黑」，必須先用白金那張。如果過一段時間，簽賬紀錄夠勁，還款紀錄良好，AE會有機會考慮邀請你成為黑卡人。
點先為之「簽賬夠勁」？兩年前，我申請AE白金卡，其實就係為咗黑卡呢個終極目標，所以當日個AE職員上嚟我公司向我介紹白金卡資料嘅時候，我也問了關於黑卡的問題。我要簽夠幾多錢，先可以上到黑卡？「葉生，其實冇一個特定金額，但通常大概簽到百五萬至兩百萬一年，如果keep到幾年係咁，應該有機會。」
咁黑卡嘅年費幾多？其實我都唔係好記得AE嗰位同事當時話幾多，但肯定過三萬，而且印象中仲有個幾萬蚊嘅joining fee。即係頭一年用黑卡，就算一蚊都冇簽過，都要畀八、九萬出嚟。不過講真，區區幾萬年費，算得係乜？我有個client，佢朋友係一名非常出名嘅城中富豪。唔係好耐之前，呢位城中富豪喺蘇富比買咗一件心頭好，價值過千萬元。點畀錢？碌黑卡。
收你幾萬元年費，黑卡到底有甚麼尊貴待遇？太多太多，冇可能喺度講得晒，但最有型還是他們的 concierge service，即是類似私人助理服務。好多你想像唔到嘅要求，黑卡的concierge都可以為你做到。突然想去東京食小野二郎嘅壽司？佢哋可以即刻幫你訂枱，分分鐘即晚幫你整架私人飛機飛去都仲得。想求婚，但唔知乜嘢叫做浪漫？No sweat，佢哋可以幫你搞個有咁grand得咁grand，有咁 sweet得咁sweet嘅求婚場面，包保你女友感動到口水鼻涕一齊流。連愛情都買到，仲想點？
思鄉食港杯麵 盛惠500元
但說到最經典的黑卡服務，還是以下這段真人真事。幾年前，富豪去到外國，突然思鄉起來，想食香港嘅杯麵，但係唔知邊度有得買。於是，佢就打畀黑卡嘅concierge，然後好似個小朋友咁話：「我要食杯麵。」陳生，冇問題，有冇話想要邊隻味？「海鮮味！海鮮味！」一個海鮮味杯麵，就這樣，於半小時內出現了。很感動吧？個價錢仲感動。買一買個杯麵，送一送上去，AE收咗呢位富豪500大元。
黑卡的尊貴程度，無卡能及。但早陣子，某某銀行推出一張信用卡，竟然也叫黑卡。名有相同唔緊要，但嗰句廣告口號，真係笑死人：「世界，此『黑』最大。」睇完佢哋嘅廣告，我先知，某某銀行嘅世界，原來咁細。
如果你問我，美國運通嘅黑卡同某某銀行嘅黑卡有乜嘢分別，我會話，係黑人同亞洲人嘅分別。有人說，當女孩子跟黑人交往過後，就再不會跟亞洲人交往，因為亞洲人個「世界」太細。某某黑卡同亞洲人一樣，根本冇feel。而AE黑卡同黑人一樣，則可以給你「最大」可能性。Once you go black，冇錯，you never go back。
葉朗程 |
